ក្នុងឆ្នាំ២០២៥កន្លងមក ក្រសួងព័ត៌មានបានដាក់ចេញនូវទិសដៅយុទ្ធសាស្ត្រចំនួន៥ ដែលស្របទៅនឹងផែនការយុទ្ធសាស្ត្រអភិវឌ្ឍន៍ជាតិ និងយុទ្ធសាស្ត្របញ្ចកោណដំណាក់កាលទី១ ដោយបង្ហាញពីតួនាទីកាន់តែសំខាន់របស់ក្រសួង មិនត្រឹមតែជាស្ថាប័នផ្តល់ព័ត៌មានជូនប្រជាពលរដ្ឋប៉ុណ្ណោះទេ ប៉ុន្តែថែមទាំងចូលរួមថែរក្សាសណ្ដាប់ធ្នាប់ និងសន្តិសុខជាតិផងដែរ។

ការលើកឡើងនេះ ត្រូវបានធ្វើឡើងដោយ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងឱកាសអញ្ជើញជាអធិបតីបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងព័ត៌មាន នាព្រឹកថ្ងៃទី១៩ ខែមករា ឆ្នាំ២០២៦ នៅទីស្ដីការក្រសួង ក្រោមមូលបទ «ការពង្រឹងប្រសិទ្ធភាព និងសមត្ថភាពស្ថាប័នក្រោមរចនាសម្ព័ន្ធ មុខងារ និងភារកិច្ចថ្មី»។

ឯកឧត្តម នេត្រ ភក្ត្រា បានមានប្រសាសន៍ថា ក្រោមការដឹកនាំប្រកបដោយភាពឈ្លាសវៃ និងចក្ខុវិស័យវែងឆ្ងាយរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងនីតិកាលទី៧ នៃរដ្ឋសភា ក្រសួងព័ត៌មានបានកំណត់ចក្ខុវិស័យឱ្យក្លាយជាស្ថាប័នទំនាក់ទំនងរាជរដ្ឋាភិបាលប្រកបដោយបុរេសកម្ម សកម្ម និងអន្តរសកម្ម មានប្រសិទ្ធភាព និងប្រសិទ្ធផល ក្នុងការគ្រប់គ្រងលំហូរព័ត៌មាន ធានាសន្តិសុខព័ត៌មាន និងសណ្ដាប់ធ្នាប់សាធារណៈ។

ដើម្បីសម្រេចបាននូវចក្ខុវិស័យនេះ ក្រសួងព័ត៌មានបានដាក់ចេញទិសដៅយុទ្ធសាស្ត្រចំនួន៥ រួមមាន៖
១) ការធ្វើទំនើបកម្មស្ថាប័ន និងកសាងរដ្ឋបាលទំនើប តាមរយៈការកែទម្រង់ប្រព័ន្ធគ្រប់គ្រង និងដំណើរការការងារ ដើម្បីធានាប្រសិទ្ធភាព និងគុណភាពការងារ
២) ការកំណត់បទដ្ឋានច្បាប់គតិយុត្ត បទដ្ឋានបច្ចេកទេស និងប្រព័ន្ធវាយតម្លៃការងារ
៣) ការកសាង និងអភិវឌ្ឍសមត្ថភាពជំនាញគ្រប់គ្រង ដឹកនាំ និងបច្ចេកទេស
៤) ការគ្រប់គ្រងលំហូរព័ត៌មានឱ្យមានប្រសិទ្ធភាព និងសុវត្ថិភាព ដោយផ្អែកលើការផ្តល់ព័ត៌មានទូលំទូលាយ ទាន់សភាពការណ៍ និងមានគុណភាព
៥) ការលើកកម្ពស់កិច្ចសហប្រតិបត្តិការ និងភាពជាដៃគូ ក្នុងក្របខ័ណ្ឌទ្វេភាគី និងពហុភាគី ដើម្បីផលប្រយោជន៍រួម។

ជាមួយគ្នានេះផងដែរ ក្រសួងព័ត៌មានបាន និងកំពុងជំរុញការគោរពសិទ្ធិសេរីភាពសារព័ត៌មាន សិទ្ធិក្នុងការបញ្ចេញមតិ និងសិទ្ធិក្នុងការទទួលបានព័ត៌មាន ក្នុងចំណោមប្រតិបត្តិករព័ត៌មាន អ្នកសារព័ត៌មាន និងអ្នកផលិតមាតិកា ដោយផ្អែកលើបុព្វហេតុការពារសន្តិភាព ស្ថិរភាពនយោបាយ និងសណ្ដាប់ធ្នាប់សង្គម។

ឯកឧត្តមរដ្ឋមន្ត្រី បានសង្ឃឹមថា សន្និបាតរយៈពេល៣ថ្ងៃនេះ នឹងផ្តល់ឱកាសឱ្យថ្នាក់ដឹកនាំ និងមន្ត្រីរាជការទាំងអស់ ចូលរួមវាយតម្លៃសមិទ្ធផលការងារឆ្នាំ២០២៥ និងរួមគ្នាកំណត់ទិសដៅការងារជាយុទ្ធសាស្ត្រ ដើម្បីលើកស្ទួយវិស័យព័ត៌មាន និងសោតទស្សន៍ ដែលជាធាតុសំខាន់ក្នុងការលើកកម្ពស់កិត្យានុភាពកម្ពុជា នៅក្នុងតំបន់ និងលើឆាកអន្តរជាតិ។

សូមបញ្ជាក់ថា សន្និបាតក្រសួងព័ត៌មាននេះ ប្រព្រឹត្តទៅរយៈពេល៣ថ្ងៃ ចាប់ពីថ្ងៃទី១៩ ដល់ថ្ងៃទី២១ ខែមករា ឆ្នាំ២០២៦៕