(កណ្តាល)៖ លោក ស្រ៊ុន លាងហួរ ប្រធានការិយាល័យកសិកម្មស្រុកខ្សាច់កណ្ដាល បានថ្លែងទទួលស្គាល់ថា មន្ត្រីពេទ្យសត្វខេត្តកណ្ដាល ពិតជាបានប្រមូលលុយ ពីអាជីវករអ្នកលក់សាច់ជ្រូក.សាច់គោ.តាមផ្សារ និងតាមភូមិ.ក្នុងស្រុកខ្សាច់កណ្ដាល ដោយ១ខែៗចាប់ពី៧០.០០០រៀលទៅ១០០.០០០រៀល ក្នុង១ជ្រញ់ប្រាកដមែន..!!។
លោក ស្រ៊ុន លាងហួរ បន្តថា ការប្រមូលលុយរាល់ខែ ពីអ្នកលក់សាច់ជ្រូក.សាច់គោបែបនេះ គឺមានរយៈពេលជាង២០ឆ្នាំមកហើយ!។

បើតាមលោក ស្រ៊ុន លាងហួរ ការកំណត់យកលុយពីអាជីវករដូចចំនួនខាងលើ ពីសំណាក់មន្ត្រីពេទ្យសត្វ អាចជាការបង់ពន្ធចូលរដ្ឋ.!គ្រាន់តែមន្ត្រីពេទ្យសត្វ យកលុយពីគេរាល់ខែ ដោយមិនចេញវិក្កយបត្រនិងបង្កាន់ដៃបង់ពន្ធប៉ុណ្ណោះ..!!។

*ចំពោះសំណួរថា តើការបង់ពន្ធថ្លៃ”ឡសត្តឃាត”ដោយជ្រូក១ក្បាល៥.០០០រៀលនោះយ៉ាងម៉េចវិញ..?។
*លោក ស្រ៊ុន លាងហួរ បានឆ្លើយថា ការបង់ថ្លៃកុងស៊ី”ឡសត្តឃាត”ផ្សេងទៀតដាច់ដោយឡែកពីគ្នា.!។

លោក ស្រ៊ុន លាងហួរ បញ្ជាក់ថា ខ្ញុំពុំបានប្រមូលលុយខែ ពីអាជីវករនោះទេ ហើយអ្នកដែលប្រមូលជាក់ស្ដែង!។
គឺខាងការិយាល័យផលិតកម្ម និងបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទខេត្តកណ្ដាល.!។

*ករណីនេះមេពេទ្យសត្វ ខេត្តកណ្ដាល

កំពុងចង់ស្គាល់ឈ្មោះ ថាតើអាជីវករម្នាក់ណា ដែលនិយាយរឿងបង់លុយឱ្យពេទ្យសត្វ..!។

*ជាក់ស្ដែង អាជីវករអ្នកលក់សាច់ជ្រូក ក្នុងផ្សារព្រែកតាមាក់.ផ្សារវិហារសួគ៌ នៃស្រុកខ្សាច់កណ្ដាល បានអះអាងថា ខ្លួនលក់រាល់ថ្ងៃសឹងតែរកប្រាក់ចំណេញលែងបានហើយ ព្រោះត្រូវចំណាយច្រើនពេកសព្វបែបយ៉ាងតែម្ដង..!។
ក្នុងនោះកាប់ជ្រូក១ក្បាល បង់ឱ្យ”ឡសត្តឃាត”(កុងស៊ី)ចំនួន៥.០០០រៀលជាកំហិត.បង់ថ្លៃភាស៊ីប្រចាំថ្ងៃថែមទៀត.!។
បង់ឱ្យពេទ្យសត្វ ថ្លៃបន្តអាជ្ញាប័ណ្ណ លក់សាច់ជ្រូកក្នុង១ជ្រញ់ៗ ចាប់ពី១.០០០.០០០រៀល ទៅ១.៣០០.០០០រៀលក្នុង១ឆ្នាំម្ដងយ៉ាងទៀងទាត់..!។

បន្ទុកកាន់តែធ្ងន់ជាងនេះទៀត គឺមន្ត្រីពេទ្យសត្វ បានកំណត់ឱ្យពួកខ្លួន ដែលជាអ្នកលក់សាច់ជ្រូក បង់លុយចូលហោប៉ាវ ក្នុង១ខែចាប់ពី៧០.០០០រៀលទៅ១០០.០០០រៀលជាកំហិត! ដោយការបង់លុយទាំងនេះ យូរឆ្នាំមកហើយរហូតក្លាយជាទម្លាប់ ដែលមិនអាចកែប្រែបាន..!។

អ្នកលក់សាច់ជ្រូកបន្តថា អាជីវករផ្សេងៗទៀត ក៏មានវាសនាមិនខុសពីខ្លួនដែរ ដោយត្រូវបង់លុយ ឱ្យពេទ្យសត្វប្រចាំខែ និងបង់ថ្លៃបន្តអាជ្ញាប័ណ្ណ១ឆ្នាំជាង១.០០០.០០០រៀល..!។

*រីឯអាជីវករអ្នកលក់សាច់គោ ក៏បានលើកឡើងស្រដៀងគ្នាដែរថា ខ្លួនលក់រាល់ថ្ងៃ គឺត្រូវបង់លុយឱ្យពេទ្យសត្វក្នុង១ខែ ចំនួន១០០.០០០រៀលជាកំហិត!។
ចំពោះការបន្តអាជ្ញាប័ណ្ណ លក់សាច់គោគឺ១ឆ្នាំ បង់អស់ចាប់ពី៣០០ដុល្លារ ទៅ៤០០ដុល្លារឯណោះ!។
ពោលគឺ អ្នកលក់សាច់គោដទៃទៀត នៅផ្សារ ក៏ត្រូវបង់លុយឱ្យពេទ្យសត្វខេត្តកណ្ដាល ដូចតែគ្នាហ្នឹង.!!។

អ្នកលក់សាច់គោ បន្តទៀតថា ការបង់លុយដូចចំនួនខាងលើ គឺសម្រាប់អាជីវករចាស់ៗ ដែលលក់ដូរក្នុងផ្សាររាប់ឆ្នាំមកហើយ។
ដោយឡែក សម្រាប់អ្នកសុំច្បាប់អាជីវកម្មលក់សាច់ជ្រូក.សាច់គោថ្មីវិញ គឺបង់អស់ចាប់ពី៥០០ដុល្លារ ទៅ៧០០ដុល្លារឯណោះក្នុង១ជ្រញ់..!!។

ជាមួយគ្នានេះ ពលរដ្ឋអ្នកកាប់ជ្រូកលក់បន្តិចបន្តួចតាមភូមិ ក៏បានអះអាងដែរថា ខ្លួនពិតជាបានបង់លុយឱ្យពេទ្យសត្វក្នុង១ឆ្នាំចំនួន៣៥០.០០០រៀលប្រាកដមែន! ខណៈការបន្តអាជ្ញាប័ណ្ណនិងថ្លៃ”ឡសត្តឃាត”គេគិតផ្សេងទៀត..!។

*ដើម្បីឱ្យមានចម្លើយទាំងសងខាង នៅថ្ងៃទី២៦.០៤.២០២៦”ដើមរាំង”បានព្យាយាមសុំការបំភ្លឺពីលោក ហេង ផាត មន្ត្រីពេទ្យសត្វខេត្តកណ្តាល ទទួលបន្ទុកស្រុកខ្សាច់កណ្ដាល ប៉ុន្តែទូរស័ព្ទរបស់លោក មិនអាចទាក់ទងបាន.!។

*លោក ស្រ៊ុន លាងហួរ ប្រធានការិយាល័យកសិកម្មស្រុកខ្សាច់កណ្ដាល គឺបានថ្លែងដូចខាងលើ.!។

*រីឯលោក អ៊ុច សុវណ្ណ ប្រធានការិយាល័យផលិតកម្ម និងបសុព្យាបាល នៃមន្ទីរ កសិកម្មរុក្ខាប្រមាញ់និងនេសាទ ខេត្តកណ្ដាល

បានថ្លែងនិងចោទជាសំណួរបកមកកាន់”ដើមរាំង”វិញថា.តើលោកបានតួរលេខនៃការបង់លុយទាំងហ្នឹង ពីណាមក.តើអាជីវករម្នាក់ណា ដែលនិយាយ…!!។

*ចំពោះសំណួរថា តើលោកបានដឹងឬទេចំពោះការបង់លុយប្រចាំខែ..?។
*លោក អ៊ុច សុវណ្ណ បានឆ្លើយថា ចាំមើលខ្ញុំហៅ អាជីវករនិងមន្ត្រីខ្ញុំ មកជួបមុខគ្នាផ្ទាល់នៅកន្លែង តើអ្នកបង់លុយនិងអ្នកទទួលលុយនុងពិតទេ!.ហើយបើពិតមែន ហេតុអ្វីបានយកលុយ.?!!។

*ចំណែកលោក លឹម ងួនគ្រុយ ប្រធានមន្ទីរកសិកម្ម រុក្ខាប្រមាញ់និងនេសាទ ខេត្តកណ្តាលស្ដីទី

បានថ្លែងថា ខ្ញុំពុំបានដឹងទេចំពោះការបង់លុយទាំងនុង.!។
ចំពោះការបន្តអាជ្ញាប័ណ្ណ លក់សាច់ជ្រូកសាច់គោ ក្នុង១ឆ្នាំម្ដង លោក លឹម ងួនគ្រុយ អះអាងថា ពុំមានការបង់ប្រាក់ច្រើនបែបនេះឡើយ…!!។

លោក លឹម ងួនគ្រុយ បន្តថា ការយកលុយខែដូចចំនួនខាងលើ សង្ស័យថៅកែផ្សារឬម្ចាស់ភាស៊ីផ្សារ ជាអ្នកយក.ពុំមែនជាពេទ្យសត្វនោះឡើយ.!។

*លុះ”ដើមរាំង”ប្រាប់ថា ប្រធានការិយាល័យកសិកម្មស្រុកខ្សាច់កណ្ដាល ជាអ្នកនិយាយដោយផ្ទាល់រឿងបង់ខែឱ្យពេទ្យសត្វ..!។
*ស្រាប់តែលោក លឹម ងួនគ្រុយ ឆ្លើយថា ចាំមើលខ្ញុំសួរមន្ត្រីខ្ញុំ ឱ្យច្បាស់សិនអញ្ចឹង.!!។

*ចំពោះលោក ឌឹម បូរ៉ា អភិបាលរងខេត្ត និងជាអ្នកនាំពាក្យរដ្ឋបាលខេត្តកណ្ដាល

មិនអាចសុំការអត្ថាធិប្បាយបានទេ ដោយទូរស័ព្ទចូលហើយ គ្មានអ្នកទទួល.!។

*ក្នុងរឿងនេះ អាជីវករនិងមជ្ឈដ្ឋានខាងក្រៅសុំស្នើយ៉ាងទទូចដល់ ឯកឧត្តម គួច ចំរើន អភិបាលខេត្តកណ្ដាល

ឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ

ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ

ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាចាត់វិធានការវះកាត់ ចំពោះមន្ត្រីខិលខូចដែលបន្លំនិងសំងំប្រព្រឹត្តអំពើពុករលួយធ្ងន់ធ្ងរ ដោយគាបសង្កត់កំណត់យកលុយប្រចាំខែ ពីអ្នកលក់សាច់ជ្រូកសាច់គោ ក្នុងភូមិសាស្ត្រខេត្តកណ្ដាល កុំឱ្យមានការយោគយល់ឱ្យសោះ! ដើម្បីអនុវត្តឱ្យបាននូវកំណែទម្រង់ស៊ីជម្រៅ របស់រាជរដ្ឋាភិបាលកម្ពុជាអាណត្តិទី៧៕